மாமல்லபுரம்-புதுச்சேரி இடையே பெஞ்சல் புயல் கரையைக் கடந்தது

சென்னையில் எக்ஸ்பிரஸ் ரெயில்களின் சேவையில் மாற்றம்

பெஞ்சல் புயல் காரணமாக சென்னை சென்ட்ரலில் இருந்து இயக்கப்படும் சில விரைவு ரெயில்கள் இன்று கடற்கரை ரெயில்நிலையத்தில் இருந்து புறப்படுகின்றன. அதன் விபரம்;

* சென்ட்ரல் - கொல்லம் சிறப்பு ரயில் (நள்ளிரவு 12.30)

* சென்ட்ரல் - ஈரோடு ஏற்காடு எக்ஸ்பிரஸ் (இரவு 11.55)

* சென்ட்ரல் -திருவனந்தபுரம் ரயில் (இரவு 8 )

* சென்ட்ரல் - பெங்களூரு மெயில் (இரவு 11.30)

* சென்ட்ரல் - கோவை அதிவிரைவு ரயில் (இரவு 11)

* சென்ட்ரல் - கோவை சேரன் எக்ஸ்பிரஸ் இரவு 10.30)

அதேபோல, சென்ட்ரலில் இருந்து பெங்களூரு, மங்களூரு, திருப்பதி மற்றும் மும்பை செல்லும் எக்ஸ்பிரஸ் ரெயில்கள் திருவள்ளூரில் இருந்து புறப்படும். சென்ட்ரலில் இருந்து கோவை செல்லும் இண்டர்சிட்டி எக்ஸ்பிரஸ் ரெயில் ஆவடி ரெயில் நிலையத்தில் இருந்து புறப்படும் என அறிவிக்கப்பட்டுள்ளது.

’பெஞ்சல்’ புயல் பாதிப்பு - சென்னை விமான நிலையம் நாளை அதிகாலை வரை மூடல்

விமான ஓடுபாதையில் தேங்கிய மழையால் சென்னை விமான நிலையத்தில் விமானங்களை இயக்க முடியாத சூழல் நிலவுகிறது. அதேபோல, மோசமான வானிலை காரணமாக சென்னைக்கு வர வேண்டிய 19 விமானங்கள் வேறு விமான நிலையங்களுக்கு திருப்பிவிடப்பட்டு உள்ளன. குறிப்பாக சென்னையில் 55 விமான சேவை ரத்துசெய்யப்பட்டு உள்ளது.

முன்னதாக விமானங்களின் சேவை இரவு 7.30 மணி வரை ரத்துசெய்யப்படுவதாக அறிவிக்கப்பட்டு இருந்தது. இந்த நிலையில், பயணிகளின் பாதுகாப்பு கருதி சென்னை விமான நிலையம் நாளை அதிகாலை 4 மணி வரை மூடப்படுவதாக சென்னை விமான நிலைய நிர்வாகம் அறிவித்துள்ளது. விமான நிலையம் மூடப்படுவதால் உள்ளூர், வெளி மாநிலம் மற்றும் வெளிநாடுகளுக்கு செல்வதற்காக சென்னை விமான நிலையம் வந்துள்ள பயணிகள் கடும் அவதியடைந்துள்ளனர். 

சென்னை மழை: கொருக்குப்பேட்டை ரெயில் நிலையத்தில் மழை நீர் தேக்கம்

சென்னையில் பெய்த தொடர் மழை காரணமாக கொருக்குப்பேட்டை ரெயில் நிலையத்தில் தண்டவாளம் முழுவதும் மழை நீர் சூழ்ந்துள்ளது.  

சென்னை அடுத்த ஆவடியில் மின்சார கம்பி மீது தென்னை மரம் விழுந்து மின்சார தடை ஏற்பட்டு உள்ளது. இதனால், அப்பகுதி மக்கள் வீட்டை விட்டு வெளியே வர முடியவில்லை. அந்த பகுதியில் போக்குவரத்தும் பாதிக்கப்பட்டு உள்ளது.

புயல் முழுமையாக கரையை கடக்க சில மணி நேரங்கள் ஆகலாம் - பாலச்சந்திரன் 

சென்னையில் இருந்து 100 கிலோமீட்டர் தொலைவில் புயல் உள்ளது. 10 கிலோமீட்டர் வேகத்தில் நகர்ந்து வருகிறது. புயல் காரைக்கால் - மாமல்லபுரம் இடையே புதுவைக்கு அருகில் இன்று மாலை புயல் கரையை கடக்கிறது. கரைக்கு அருகே வரும்போது புயலின் நகர்வு வேகம் குறையும். புயல் முழுமையாக கரையை கடக்க சில மணி நேரங்கள் ஆகலாம். மயிலாடுதுறை முதல் திருவள்ளூர் வரை 90 கிலோமீட்டர் வேகத்தில் பலத்த காற்று வீசும்.

சென்னை, திருவள்ளூர், காஞ்சிபுரம், செங்கல்பட்டு, விழுப்புரம், கடலூர், கள்ளக்குறிச்சி ஆகிய மாவட்டங்களிலும், புதுச்சேரியிலும் இன்று அதி கனமழை பெய்யக்கூடும். ராணிப்பேட்டை, திருவண்ணாமலை, பெரம்பலூர், வேலூர், அரியலூர், தஞ்சாவூர், திருவாரூர், மயிலாடுதுறை, நாகப்பட்டினம் ஆகிய 9 மாவட்டங்களில் இன்று கனமழை பெய்யக்கூடும்.' என்றார்.

தாம்பரம்: குரோம்பேட்டையில் உள்ள அரசு பொது மருத்துவமனை மற்றும் நெஞ்சக மருத்துவமனையில் மழைநீர் தேங்கியுள்ளதால் நோயாளிகள் அவதியடைந்துள்ளனர். மருத்துவமனைக்கு மழைநீர் வருவதை தடுக்கும் வகையில் மணல்மூட்டைகளை அடுக்கி போலீசார் தடுத்து வருகின்றனர்.